| |
| | Ακροστιχίδα Ματσούκας |  | | | Η Ματσούκα είναι περιοχή του αλησμόνητου Πόντου | | |
Σην Ματσούκαν αχπάσκουμες.
Στίχοι Βασίλη Ταρνανίδη ( Αδολέτε)
1
Εχπάσταμε κι εχ’ κι έρχουμες
Ματσούκα μ’ σα χωρία σ’,
λασ’ καπ’ εκ’ ες αντιβοούν
τη κυρού μ’ τα λαλίας.
2
Εχπάσταμε κι έχ’ κι έρχουμες
Ματσουκάτ’κα παιδία,
ατσιά Ματσούκα μ’ έμευες
αοίκον στιχαρίαν.
3
Ματσούκα μ’ σα ταφία σου
ψύ’α φτυρολακίζ’νε
πολεμούν ν΄αναστίουνταν
κι εμάς καλωσορίζ’νε.
4
Ματσούκα μ’ τα ποτάμια σου
άλλο ’κι κατενίζ’νε
τα νύχτας λάσκουν παλαιοί
τ’ ονέρτα σ’ ταραχίζ’νε.
5
Ματσούκα μ’ σα ρακάνια σου
ντ’ ανθούν ’κι είναι τσιτσιάκια,
αροθυμία ‘φλούγκωσεν
με τ’ ομματί’ μ’ τα δάκρια
6
Άθαφτων ψ’ήα, τα νερά σ’
με τα ραβδιά ταράζ’νε,
πουστουροκαλατσιέματα,
ατσιά ντο λοαριάζ’νε.
7
Ανάθεμά τον π΄εποί’νεν
και την ανταλλαήν,
έχπασεν κι επεκόλ΄τ΄σε με
α’ ση κυρού μ’ την γην.
8
Ανάθεμα τον μάστοραν
π’ έχτιζεν τα παπόρια
κι εμέν εκρέμ’σεν σα μακρά
κι α’ σα ταφία μ’ χώρια.
9
Ας αρχινώ να τραωδώ
ντο θ’ έλεεν ο κύρη μ’,
η άγωμα τ’ απ’ εσ’ σην ψ’ή μ’,
υιέ μ’ ποί’σον το χατίρι μ’.
10
Πατέρα μ’ το χατί’ρ’τ’ς τρανόν
ατό πώς να χαλάνω,
θα τραωδώ όσον επορώ
ούσαμ’ εκεί να εφτάνω.
11
Ντο λέω και ντο τραωδώ,
θα γράφτω με την πέναν
και το κοντύλ’ θα βάφτ’ατο
ση κάρδιας ημ το αίμαν.
12
Θα σοκεύω άμον ορτάρ’
ντ’ εδέβανε τα χρόνια
τ’ οψέ θα εφτάω οσήμερον
να λαρώνω τα πόνια μ’.
13
Θα χωρίζω α’ σ’ όνερον
ποίον έν’ η αλ΄ληθεια
ντο έχ’ ασλίν α’ σ’ έκ’σαμε
ποία είν΄παραμύθια.
14
Θ’ αραεύω σο Αδολή
εκ’ απάν’ σα Βλατόρια
έναν ιχνάρ’ α’ σα παλιά
ντ’ επέμ’νεν ους ατώρα.
15
Τα παρχάρια θα λάσκουμαι
κι όλια τ’ ερημωσέας
τέσκιμ νάβρηκα του κυρού μ’,
αρυπατημασέας.
16
Θ’ αραεύω σην αυλαήν
του πάπονος ιχνάρια,
έναν μακέλ, έναν στυλάρ’
θαμμένον σα χορτάρια.
17
Νά ’βρηκα έναν ταρέλαμπαν
γομάτον σο καζόπον,
ν’έφτηνα κι εχουλείτονε
το ψ’ηόπο μ’ ολιγόπον.
18
Να εύρηκα έναν σκαμνίν,
Σκωλεκοδουλεμμένον,
τραπέζ’ ασυνορθίαστον
σην ψ’ή μ’ τονατεμμένον.
19
Ξερόν τουβάρ α’ σ΄αχερών’
κι έναν κωσούς φωλέαν,
για σ’ έναν τσακωκάθρεφτον
του κυρού μ’ την θωρέαν.
20
Ας εύρηκα χαρτώματα
και πόρτας κατωθύρια,
μαυροκαμμένον τσουντσουρούκ,
φρουχνιασμένα ψαθύρια.
21
Έναν καρμενέτσας τσιβίν,
πατούλιν αρνομάλλια,
θεσοκομμέν’ έναν σιβέλ’
και σοκεμμένα ορτάρια.
22
Έναν χαλαμένον φουρνίν
για έναν καταμάγιαν,
αποκάμ’ ασυνδαύλιστα,
παξιμάτια ντ’ εκάαν.
23
Ας εύρηκα έναν μαστραπάν,
χουλιάρ πασλανεμένον,
κοπροχωμάτενον κουρκούτ,
πάτωμαν συλλεμμένον.
24
Ας εύρηκα έναν ανοιγάρ
για πόρταν τσακωμένον
έναν χαλαμένον φραχτήν
κι αζπάρ’ καρακωμένον.
25
Ας εύρηκα έναν πιρών
τεντσιερέν μανωμένον
να είχεν ξύσμαν χαβιτσί’
για τσιορβάν τανωμένον.
26
Το μαχαιρόπον ντ’ έκοφτεν
η μάνα μ’ τα στιπίτσας
για σα βρατέρια, σον κρυφτόν,
τη μωρίων κρυφτίτσας.
27
Καπ’ έναν ξεροτούβαρον
να έλεπαν τα’ ομμάτια μ’
να κονεύω άμον αετός
ν’ ανοίω τα κανάτια μ’.
28
να κλώσκιεται απ’ εσ’ σην ψ’ή μ’
ο κινηματογράφον
κι εγώ σα φυλλοκάρδιας ημ
ντ’ ελέπω όλια να γράφτω.
29
Κι εκεί απάν σ’ αράεμμαν
να εγίντον έναν θάμαν
και εύρηκα ντα σύρ’ η ψ’ή μ’!
Θεέ μ’ ψαλάφα τάμαν.
30
Έναν λετσιέκ τη μάνας ημ
κι ας έτον τσεριμένον,
τσιαρούχ χωρίς τσιαρχόσκοινα
ποντικοφαεμένον.
31
Και αν ευρήκω νε Θεέ μ’
χρυσόν καντήλ’ το τάμα μ’
το ραφιδόπον ντ’ έδενεν
την τσάμιαν ατ’ς η μάνα μ’.
Θα τραωδώ τη Ματσούκας
τ’ έρημα τ’ εκκλησόπα
ντ’ επέμ’νανε να δείκνε μας
τ’ εμέτερα τα τόπια.
1ο
Αε Θόδωρον τ’ Αδολή
παλαίν’ κι αναπαγμένον,
σου κυρού μ’ τ’ ενθυμέματα
βαθέα χαραγμένον.
2ο
Τη Παναϊας τ’ εξωκκλήσ’
εκ’ απάν’ σα Τσιμίλια,
σην Κρένασαν εφώταζεν
κι εφαίντον χίλια μίλια.
3ο
Τ’ Αε Κοσμά και Δαμιανού
σο ψηλοράχ’ σο Στάμαν,
δαχτυλί’ διαμαντόπετραν
έστραφτεν άμον θάμαν.
4ο
Αε Γιάννες ο Χρυσόστομον
εκεί σου Μελιανάντων
’κι κρούνε τα καμπάνας ατ’
άλλο α’ σου Μαγγανάντων.
5ο
Αε Παντελεήμονας
σο μεζιρέ Ομμάτ’ (ιν)
οι Φαργανάντ’ απ’ εσ’ σην ψ’ήν
έχ’νε χρυσόν κομμάτ’ (ιν)
6ο
Επέμ’νεν Αε Σέραντον
εκεί σου Τσιαχαράντων
κι ατώρα ιγιεύ’ ατ’ς τ’ όνεμαν
του Μαυροαχαράντων.
7ο
Αε Πρόδρομον σην Ζάβεραν
μαυροκαρακωμένον,
άλλο ’κι ά θυμιατίζ’ν ατον
τ’ ομούτ’ν ατ’ έν’ κομμένον.
8ο
Τ’ Αε Βλασί’ το εξωκκλήσ’
εκεί σου Γιαννακάντων
ατσιά έχ’νε ανοιγάρ’ν εθε
σου Αμαραντογλάντων;
9ο
Τ’ Αε Τριάδας τ’ εξωκκλήσ’
εκεί απάν’ σην Ποντίλαν
ν’ ανοίουμ’ ατο αναμέν’
κι άφτουμε την καντήλαν.
10ο
Τ’ Αε Νικήτα τ’ εξωκκλήσ’
απάν’ σην Κουρανόη (ν)
εκρέμ’σαν κι εγαμάρτσανε
ν’ αλί’ Κουνάκα μ’ ώι!
11ο
Του Γιαννάντων τ’ Υπαπαντής
καρακωμέν’τ’σα η πόρτα
θ’ ανοί’ σην απαντήν εμουν
όπως ε(γ)ίντον πρώτα.
12ο
Αε Γιάννε απ’ εσ’ σο σελέν
κι ολόερα τ’ ελάτια σ’,
σην αύλια σ’ σπάζ’νε Αγαρενοί,
πως εσπάλ’νες τ’ ομμάτια σ’!
13ο
Τ’ αε Σερί’ σου Κουσπιδί
τα καμπάνας ’κι κρούν’νε,
το χωρίον ερήμωσεν
και τίναν να λαλούνε.
14ο
Σον αε Γιάννεν σο Τσεβιζλούκ
οι αγγέλ’ λουτρουούνε,
ολόνυχτα σο ιερόν
ψαλμοί αντιλαλούνε.
15ο
Η Κοίμηση απ΄ εσ’ σου Κοσμά
μ’ ανοιγμένα φεγγίτας
βρέχ’ κελιαεύ’, σο ιερόν
χορεύ’νε σταλαμίτας.
16ο
Τ’ αε Δημητρί’ σην Ζανόη
οι αγγέλ’ αχπαράαν,
εφέκανε το ιερόν
σα λίβια εταράαν.
17ο
Τη Κοίμησης σην Λιβεράν
τ’ εικόνας α’τ’ς εγδάρθαν
οι ράβδοι, τα χρυσόβουλα
α’ σοι τουρκάν’τ’ς επάρθαν.
18ο
Τ’ Αε Προδρόμ’ το μαναστήρ’
ση Κουσπιδί’ τα μέρια,΄
Βαρνάβας και Σωφρόνιον
‘κι έχ’νε καλά χαπέρια.
19ο
Τη Λαραχανής τ’ εγκλησιάς
Αε Θόδωρον κι Αέρ’τ’ς (ιν)
άνοιξον και προσκήνεσον
παρηγοριάν να πέρ’τα’ς (ιν)
20ο
Σην Σκαλίταν τ’ Εισόδιας
η έμπ’ ασπαληγμένον
Αετράπεζα σο ιερόν
διπλοκαρακωμένον.
21ο
Θοδώρων σην Δανείαχαν
το στέβος εσιμίεν
τ’ εικόνας ετσιγνάεψαν
τ’ ιερόν εκρεμίεν.
22ο
Τ’ Εισοδίων σην Άγουρσαν
‘τούλωσεν η καμπάνα
αύλια τ’ς εχρταρίασεν
βόσκιεται η Κερβάνα.
23ο
Αε Γιάννες ο Ελεήμονας
σου Πιπάτ το χωρίον
άλλο ’κι σιονλικεύν’ ατο
τα λαλίας μωρίων.
24ο
Τη Χρυσοστόμ’ τη Ρωμανούς
εσάπαν τα στασίδια
απάν’ σην Αετράπεζαν
λάσκουντανε τ’ οφίδια.
25ο
Μουχαήλ’ ημ και Αρχάγγελε μ’
σου Μαντρανού τα μέρια,
εσέν χουσμετλιαεύ’νε σε
τ’ Αέρ’ τα περιστέρια.
26ο
Μισαηλάντων Τ’ Αε-Βασίλ’
εγκλησία κοιμάται,
γιόκ’σαμ τη παημονής εμουν
τα πόδας αφουκράται.
27ο
Περιστερεώτα το μαναστήρ’
ση Ζαβρίας τα μέρια
αναμέν σον εσπερινόν
τον κόσμον, σα βρατέρια.
28ο
Τη Αρμενούς το παρεκκλήσ’
τ’ς Αγια –Παρασκευής (ιν)
’κι ψάλ’νε «Ανέστη ο Χριστός»
Κερεκήν τη Λαμπρής (ιν).
29ο
Ακίνδυνον του Σεϊτάν(αντων)
‘κινδύνεψεν, εχάθεν,
ομούτ ’κι επέμ’νεν σον Θεόν,
«Η Ρωμανία ‘πάρθεν».
30ο
Κοτύλιας Αε-Πρόδρομον
νε ψάλτ’, νε ψαλμωδίας,
τ’ εικόνας εταούτεψαν
σ’ άγρια τα ερημίας.
31ο
Χριστού της θείας γέννησης,
εγκλησιά ‘ρειπωμένον
σα Λειβάδια ενέσπαλαν
αποκαρακωμένον.
32ο
Σ’ Αε Γοργόρ’ το παναϋρ’
θαρώ οψε κει εσ’ έτον,
ο κόσμον εντιβόανεν
αγγείον Κουτουλέτ’κον
33ο
Αε-Γιάννες έτον Βάλαινας
Η κωρώνα και τ’ άστρον,
ατόν και πως ’κι ωρίασεν
«του Γυδουλά το κάστρον».
34ο
Καπίκιοης Αε-Θόδωρον
εικονογραφημένον,
σα χιλ’ οχτακόσια πενήντα έξ’
έτον τονατεμένον.
35ο
Αέρ’τ’ς απ’ ‘εσ’ σην Μαζεράν
κλαίει την χαμονήν
και τ’ άλογον ατ’ έδεσεν
απ’ έσ’ σην παθενήν.
36ο
Αε-Δημήτρη μ’ σην Ζανόη
κι ολόερα τ’ ελάτια σ’,
σην αύλια σ’ σπάζ’ν’ Αγαρενοί
πως εσπάλ’νες τ’ ομμάτια σ’.
37ο
Η Κοίμησ’ απ’ έσ’ σου Κοσμά
τ’ Αυγούστ’ τη Παναϊας,
τεϊ να έτονε γραφτόν
ν’ άφτουμε τα κερία σ’.
38ο
Αε-Γιάννε μ’ σου Χορτοκοπί’
Τ’ έμορφον το χωρίον
Τ’ αράχνας κατατσίλιαξαν
«Τ’ Άγια των Αγίων».
39ο
Εκεί απ’ έσ’ σου Χαμουρή
Αέρ’τ’ς ο Μανωμένον
Ατόν τον σκύλον τον Απτήν
πως εφέκεν λυμένον!
40ο
Τρυγομηνά τ’ Αε-Δημητρί’
Λαλατσιάντ’ ντο πεγνέφκουν
κεμεντσιές κωδωνίσματα
άλλο ’κι θ’ ακουσκιέφκουν.
41ο
Αέρη μ’ π’ ελουτρούανες
σο Μουντανός αιώνας,
ατώρ’ απ’ έσ’ σο ιερό σ’
ωβάζ’νε τα κωρώνας.
Διάφορα δίστιχα Νο 16
Βασίλη Ταρνανιδη (Αδολέτε) (αροθυμίας)
Σιτ’ έπαιζα την κεμεντσιέ μ ‘
‘μάεψε με η λαλία τ’ς
ερρούξεν και εκρέμ’σεν με
‘ς σα μαύρα αροθυμίας.
Ση Ματσούκας ημ το ποτάμ’
τα χερόπα μ’ θα πλύνω
και τ’ αχπαμού την καμονήν
σα δάκρια μ’ θα διακλίνω.
Η καρδία μ’ εράευεν
την Ματσούκα μ’, τον τόπο μ’
κι’ η ψ’ή μ’ εφτιρολάκιζεν
γιαμ άδικον ο κόπο μ’.
έϊ κίτι, κίτι παλαιοί!
Απόψ’ αναστορ’ω σας.
Εξέγκα σας α’ σο ταφίν
κι’ απ’ έσ’ σην ψ’ήν τερώ σας.
Εένουμ’ άσπρον περιστέρ’
πετώ και γιανασεύω
σ’ άκροσπιτί, σο χειμωνάπ’
την τεπέν να κονεύω.
Ση Παναϊας το ποτάμ’
τα χερόπα μ’ θα πλύνω
και τ’ άσπρα τ’ εμπροκάρδια σου
σ’ εγκαλιόπο μ’ θα γλύνω.
Ο κύρη μ’ ανιστόρ’σεν με
Μάτσκα μ’ ατά τα κάλια σ’
τα ρακάνια σ’ τα πράσινα
τ’ έμορφα τα παρχάρια σ’.
Ν’ αλί εμέν π’ εγέρασα
κι έσπριναν τα μαλλία μ’
κι οντες Ματσούκα μ’ κρους σο νου μ’
πέρ’ με α’ σην καρδίαν.
Τη Ματσούκας ημ το νερόν
αμον χιονόπον κρύον
που πίνει ατο πως ν’ανασπάλ’
αοίκον τόπον θείον.
Έϊ κιτι βάϊ Ματσούκα
Στίχοι Βασίλη Ταρνανίδη (Αδολέτε)
Την Ματσούκαν σ’ ονέρτα μ’
κάθαν βράδον ελέπω,
λάσκουμαι τα παρχάρια τ’ς
σ’ έναν τόπον ’κι στέκω.
Επωδός
Έπεϊ μακρα είσαι
έϊκιτι βάϊ Ματσούκα,
να σιμών’τ’ς ολιγόπον
την γην θα κλώθω κούπα.
Τα παλαιά τα χρόνια
σον παρόν να εφέρνα
aτσιά εύτυχος θ’ έμ’νε
κι άλλο τιδέν ’κι εθέλ’να. Επωδός έπεϊ μακρά κλπ.
Οπίσ’ ατσιά θ’ εκλώσκουμ’
και την εχιά μ’ θ’ εφήνα
τ’ ηλέπαρμα σ’ να ελέπω
πιρνά οντες εγνεφήνα. Επωδός……………
Η Ματσούκα μ’ να χάται,
ας μ’ έτονε γραμμένον
κι ορτάρια ας εφόρ’να
με την κότσ’ τρυπαιμένον. Επωδός………
[B]
|
 | | | | | | | | Στατιστικά στοιχεία | | | | | Σχόλια: 4
Στα αγαπημένα: 1
| | | | | | | |
| | Θέλω να βάψω τη γης με το χρυσό σου ήλιε μου, μα συ μου καις τα σύνεργά μου! | | | |
|
χρηστος καραμανος
05-01-2010 @ 00:11 | Εχπάσταμε κι εχ’ κι έρχουμες
Ματσούκα μ’ σα χωρία σ’,
λασ’ καπ’ εκ’ ες αντιβοούν
τη κυρού μ’ τα λαλίας.
ΩΡΑΙΟΤΑΤΟΣ ΑΝΤΟΛΕΤΕΣ!!!ΥΠΕΡΟΧΟΣ ΒΑΣΙΛΗΣ ΤΑΡΝΑΝΙΔΗΣ!!! ::up.:: ::up.:: ::up.:: | | CHЯISTOS P
05-01-2010 @ 00:23 | Βρε Βασίλη, βρε Βασίλη... Και τί δεν θάδινα να το ακούσω να απαγγέλεται !... | | heardline
05-01-2010 @ 15:58 | Παρακαλώ μετάφραση εις την Αγγλικήν και μετά εις την Ελληνικήν, ή κατάλαβα πολλά ή δε κατάλαβα τίποτα.
Αι μεταφράσεις να συγκλίνουν προς την Ελληνικήν, μετά ταύτα, με μέτρο, πως λέμε πάμε μέσω Λάρισας για Αθήνα, από Χαλκίδα, έτσι ακριβώς.
Αστιεύομαι λιγάκι διότι ακόμη δεν κατακτήσαμε την Ελληνική γλώσσα και δη την δημοτική, εμ θα πάμε αμέσως σε ξένες γλώσσες και τι γλώσσες, εντελώς προσιτές.
Τι να πω, έχω μείνει στήλη άλατος, εν μέσω της Ερήμου και άντε να γλυτώσεις,.........καμιά καμήλα ταξί παρακαλώ,.....υπάρχει ????
| | Τσακίρη Χαρά
06-01-2010 @ 23:15 | Κ.Βασίλη μου χρόνια πολλά και καλή χρονιά σας εύχομαι με υγεία κι αγάπη πρωτίστως!
Είμαι απαραδεκτη που δεν πήρα ούτε ένα τηλέφωνο αλλά θα επανορθώσω σύντομα! Εύχομαι τα καλύτερα για εσάς και την υπέροχη Κυρία σας και ελπίζω να ξανανταμώσουμε σύντομα!
Να γράφεις να μαθαίνουμε κ.Βασίλη μου!!!! ::hug.:: | |  |
Πρέπει να συνδεθείς για να μπορείς να καταχωρίσεις σχόλιο
|
|
|
